ހުކުރު ދުވަހާ ހަމަޔަށް މޫސުން ގޯސްވާނެ ކަމަށް ލަފާކޮށްފި
މިއަދުން ފެށިގެން ހުކުރު ދުވަހާ ހަމަޔަށް ރާއްޖޭގެ ބޮޑުބަޔަކަށް މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާ (މެޓް) އިން ލަފާކޮށްފިއެވެ.
އެ އިދާރާއިން އިއްޔެ ނެރުނު ބަޔާނެއްގައިވާ ގޮތުން ރާއްޖޭގެ އިރުން ހުޅަނގުދެކުނު ބޭ އޮފް ބެންގާލް ގައި ވަނީ ކޮޅިގަނޑެއް އުފެދިފައެވެ. އަދި މި ކޮޅިގަނޑު ހުޅަނގަށް ޖެހި، ރާއްޖޭގެ ސަރަހައްދުގައި ބޯވިއްސާރަވިލާ އުފެދުމުގެ ފުރުސަތު ބޮޑުވާނެ ކަމަށް ވަނީ ލަފާކޮށްފައެވެ.
މެޓުން ލަފާކުރިގޮތުގައި، މި ވިއްސާރައިގައި ބައެއް ރަށްރަށަށް ބޯކޮށް ވާރޭވެހުމާއެކު ގުގުރާނެއެވެ. މީގެއިތުރުން، ވައި ގަދަވެ، ކަނޑުތައް ގަދަވާނެ ކަމަށާއި، ހާއްސަކޮށް އުތުރާއި މެދުރާއްޖެތެރޭގެ ރަށްތަކަށް އުދައިގެ އަސަރުކުރުމުގެ ފުރުސަތު އޮތްކަން ވަނީ ފާހަގަކޮށްފައެވެ.
މެޓުން ވަނީ މޫސުން ގޯސްވުމުގެ ސަބަބުން ލިބޭ ގެއްލުންތައް ކުޑަކުރުމަށް އަޅަންޖެހޭ ފިޔަވަޅުތައް އެޅުމަށް އިލްތިމާސްކޮށްފައެވެ. އަދި މެޓުން ނެރޭ އެންމެ ފަހުގެ މޫސުން ލަފާކުރާގޮތާއި މޫސުމީ ސަމާލާއި އިންޒާރުތަކަށް ހާއްސަ ސަމާލުކަމެއް ދިނުމަށްވެސް ވަނީ އިލްތިމާސްކޮށްފައެވެ.
މި އަހަރު ފެށުނީއްސުރެ ރާއްޖޭގެ އެކި ސަރަހައްދުތަކަށް ވަނީ މޫސުން ގޯސްވެފައެވެ. އެގޮތުން، ލ.އަތޮޅަށްވެސް ވަނީ އަހަރުގެ ފުރަތަމަ ހަފުތާގައި ބޯކޮށް ވާރޭވެހިފައެވެ.
