ސިޔާސީ މަޤާމުތަކުގެ ތަފްޞީލު ހާމަނުކުރާތީ ލާމު އަތޮޅު ކައުންސިލް ރައީސްގެ ވަރުގަދަ ފާޑުކިޔުން ސަރުކާރަށް

ސަރުކާރުގެ ސިޔާސީ މަޤާމުތަކުގައި ތިބި މީހުންގެ އަދަދާއި އެމީހުން ތިބި އޮފީސްތަކުގެ ތަފްޞީލު ހާމަކުރުމަށް ސަރުކާރުން ފަސްޖެހޭތީ، ލާމު އަތޮޅު ކައުންސިލްގެ ރައީސް އިސްމާއިލް އަލީ ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.

އިސްމާއިލް އަލީގެ ފޭސްބުކް ޕޭޖުގައި މިއަދު އާންމުކުރެއްވި ސްޓޭޓަސްއެއްގައި ވިދާޅުވެފައިވަނީ، ސަރުކާރުން މަކަރާއި ހީލަތުން އުޅެން ބޭނުންނުވާނަމަ، ސިޔާސީ މަޤާމުތަކުގެ ތަފްޞީލު ހާމަކުރަން ނުކެރެންޖެހޭ އެއްވެސް ސަބަބެއް ނެތް ކަމަށެވެ. އަދި މިހާރުގެ ސަރުކާރުން އެތައް ބަޔަކަށް ސިޔާސީ މަޤާމުތައް ދީފައިވާއިރު، އެމީހުންނަށް މަޤާމު ލިބުނުކަން އުފާފާޅުކޮށް ފާހަގަކުރުންވެސް އޮތީ މަނާކޮށްފައި ކަމަށް ތުހުމަތު ކުރެއްވިއެވެ.