ލ. އަތޮޅުގެ ދެވަނަ އެއަރޕޯޓް މާވަށުގައި ގާއިމުނުކުރަން ނިންމުމުން މާވަށު ކައުންސިލުން ކަންބޮޑުވުން ފާޅުކޮށްފި
Laamu. atholhuge dhevana airport maavashugai qaaim nukuran ninmumun maavashu councilun kanboduven faalhukohffi
ހައްދުންމަތީގައި ގާއިމުކުރާ ދެވަނަ އެއަރޕޯޓް އެޅުމަށް ސަރުކާރުން އިސްދޫ-ކަލައިދޫ ކަނޑައެޅުމާ ގުޅިގެން، މާވަށު ކައުންސިލުން އެކަމާ ހިތާމަކުރާކަން ހާމަކޮށް ނޫސްބަޔާނެއް ނެރެފިއެވެ. މާވަށު ކައުންސިލުން ބުނެފައިވަނީ އެއަރޕޯޓް އެޅުމުގެ ޝަރުޠު އެންމެ ފުރިހަމަވާ ރަށަކީ މާވަށް ކަމަށްވީ ނަމަވެސް، ސަރުކާރުގެ މި ނިންމުމަކީ އެ ރަށުގެ ރައްޔިތުންނަށް ލިބުނު ވަރަށް ބޮޑު ހިތްދަތިކަމެއް ކަމަށެވެ.
އެއަރޕޯޓް ސިޔާސަތާއި މާވަށުގެ ހާލަތު
ސަރުކާރުން ގެންގުޅުއްވާ މުހިންމު ސިޔާސަތެއް ކަމަށްވާ، ސްޕީޑް ލާންޗުގައި 35 މިނިޓުން ނުދެވޭ ދުރުމިނުގައި ހުންނަ ރަށްރަށުގައި އެއަރޕޯޓް ގާއިމުކުރުމުގެ ސިޔާސަތަށް އަލިއަޅުވާލަމުން ކައުންސިލުން ފާހަގަކުރީ، މިހާރު އޮތް ކައްދޫ އެއަރޕޯޓާ އެންމެ ދުރުގައި އޮތް ރަށަކީ މާވަށް ކަމަށެވެ. އެހެންކަމުން، އެ ސިޔާސަތުގެ ދަށުން އެންމެ ބޮޑު އިސްކަމެއް ދޭންޖެހޭނީ މާވަށަށް ކަމަށް ކައުންސިލުން ދެކެއެވެ.
ކައުންސިލްގެ ބަޔާނުގައި ބުނެފައިވަނީ، ”މާވަށް އިހުމާލުކޮށްލައްވައި އެހެން ރަށެއް އެކަނި ޝަރުޠު ފުރިހަމަވާކަމަށް ރައީސުލްޖުމްހޫރިއްޔާއަށް ލަފާއަރުވައިގެން އެ ގޮތަށް ނިންމެވި ނިންމެވުމަކީ ރައްޔިތުންނާއި މި ކައުންސިލަށް ވެސް ގަބޫލުކުރެވޭ ނިންމުމެއް ނޫން“ ކަމަށެވެ. މި ނިންމުމުގެ ސަބަބުން ރަށުގެ ރައްޔިތުންގެ އިޖުތިމާޢީ ދިރިއުޅުމާއި ޞިއްޙީ ޚިދުމަތް ހޯދުމަށް ކުރާ އުންމީދުތަކަށް ހުރަސް އެޅިފައިވާ ކަމަށްވެސް ބަޔާނުގައިވެއެވެ.
ކެތްތެރިކަން އިސްކުރުމަށް އިލްތިމާސްކުރުން
މި ނިންމުމާ ގުޅިގެން ރަށުގެ ބައެއް ފަރުދުންގެ ފަރާތުން ފެންނަމުންދާ ޖަޒުބާތީ އަމަލުތަކާ މެދު ކައުންސިލުން ވަނީ ކަންބޮޑުވުން ފާޅުކޮށްފައެވެ. މާވަށުގެ ތާރީޚަށް ބަލާއިރު، އެ ރަށަކީ ވިސްނުންތެރި އަދި އަޚުލާޤު ރަނގަޅު ބަޔަކު ދިރިއުޅޭ ރަށެއްގެ ގޮތުގައި މަޝްހޫރުވެފައިވާ ރަށެއްކަން ކައުންސިލުން ހަނދާންކޮށްދިނެވެ. 1836 ވަނަ އަހަރު ރާއްޖޭގެ ޗާޓު ކުރެހުމަށް އައި ޓީމުގެ ކެޕްޓަން މޮރެސްޓީ ވެސް ވަނީ މާވަށު މީހުންގެ ވިސްނުންތެރިކަމަށް ތައުރީފުކޮށްފައެވެ.
މާވަށު ކައުންސިލުން ބަޔާން ނިންމާލަމުން އިލްތިމާސްކުރީ، މި ހިތްދަތި ދަނޑިވަޅުގައި ވެސް ޖަޒުބާތުގައި ނުޖެހި، ކެތްތެރިކަމާއި ޙިކުމަތްތެރިކަން އިސްކުރުމަށެވެ. އަދި ކަންކަން ކާމިޔާބު ކުރުމަށްޓަކައި މާތްﷲގެ މަދަދަށް އެދި ދުޢާކުރުމުގައި ދެމިތިބުމަށް ރައްޔިތުންނަށް ނަސޭހަތްތެރިވެފައިވެއެވެ.
