ފީފާ ވޯލްޑް ކަޕް ތަށި ފަރުމާކުރީ ކާކު؟

ފީފާ ވޯލްޑް ކަޕް ތަށި ފަރުމާކުރީ ކާކު؟ މިލާނުގެ ކުޅަދާނަ ކުރެހުންތެރިޔާ އަދި ސުކލަޕްޗާ މާހިރު ސިލްވިއޯ ގަޒަނީގާގެ ވާހަކަ.

ދުނިޔޭގެ އެންމެ މަޤުބޫލު ކުޅިވަރު މުބާރާތް ކަމަށްވާ ފީފާ ވޯލްޑް ކަޕްގެ ތަށި އިޓަލީގެ ސިލްވިއޯ ގަޒަނީގާ ފަރުމާކުރި ގޮތާއި، އަދި މުބާރާތް ކާމިޔާބުކުރާ ޓީމުތަކަށް އަސްލު ތަށި މިލްކު ނުކުރެވެނީ ކީއްވެގެންކަން އެނގިވަޑައިގަނޭތޯއެވެ؟

ގަޒަނީގާ މި ތަށި ފަރުމާކުރީ ކުޅިވަރުގެ ތިން ޖަޒުބާތެއް އެއް ސިފައެއްގައި ހިމެނުމުގެ މަގުސަދުގައެވެ. އެއީ ކުޅުންތެރިޔާގެ ބުރަ މަސައްކަތާއި، ސަޕޯޓަރުންގެ އުފާވެރިކަމާއި، އަދި ކާމިޔާބީގެ އެ މަތިވެރި ވަގުތެވެ.

2026 ވަނަ އަހަރުގެ ވޯލްޑް ކަޕް ފައިނަލަށްފަހު، މި ތަށި އުފުލާލުމުގެ ނަސީބު ލިބޭ ޓީމަކަށް މި ތިން އިހުސާސްވެސް ކުރެވިގެންދާނެއެވެ. ފޯރިގަދަ މެޗުތަކުގެ ކުރިން، ފުޓްބޯޅައިގެ މި އެންމެ އަގުބޮޑު އިނާމާ ބެހޭ ބައެއް މައުލޫމާތުތަކަށް ބަލާލަމާ ހިނގާށެވެ.

ވޯލްޑް ކަޕް ތަށި ފަރުމާކުރީ މިލާނުގައި

1970 ވަނަ އަހަރު ބްރެޒިލްއިން ތިންވަނަ ފަހަރަށް ވޯލްޑް ކަޕް ކާމިޔާބުކުރުމުން، އޭރު ބޭނުންކުރި ‘ޖޫލްސް ރިމޭ’ ތަށި އެ ގައުމަށް ދާއިމީކޮށް ދެވުނެވެ. އެއާއެކު، އާ ތަށިއެއް ފަރުމާކުރުމަށް ފީފާއިން އާންމުކޮށް ހުޅުވާލި ފުރުސަތުގައި ކުރި ހޯދީ މިލާނުގެ އުމުރުން 50 އަހަރުގެ ސިލްވިއޯ ގަޒަނީގާއެވެ.

އޭނާ މި ތަށި ފަރުމާކުރީ މިލާނުގެ ބްރޭރާ ސަރަހައްދުގައި ހުންނަ އޭނާގެ ސްޓޫޑިއޯގައެވެ. މި ތަށިން ފެންނަނީ ދުނިޔޭގެ ގޯޅަ ނުވަތަ ‘އޯބް’ އެއް އުފުލައިގެން ތިބި ދެ އިންސާނުންގެ ސިފައެވެ. ގަޒަނީގާގެ ދަރިފުޅު ޖޯޖިއޯ ބުނި ގޮތުގައި، އޭނާގެ ބައްޕަ މި ތަށި ފަރުމާކުރުމަށް އެތައް ކުރެހުމެއް ކުރެހިއެވެ. އަދި މި ތަށިން ރަމްޒުކޮށްދެނީ މައްޗަށް އަރަމުންދާ ދެ “ޑީއެންއޭ ސްޕައިރަލް” އެވެ.

2016 ވަނަ އަހަރު އުމުރުން 95 އަހަރުގައި މަރުވި ގަޒަނީގާ އަކީ ފުޓްބޯޅައިގެ އެހެން ބައެއް މަޝްހޫރު ތަށިތައް ކަމަށްވާ ޔުއެފާ ކަޕާއި ޔުއެފާ ސުޕަ ކަޕް ފަދަ ތަށިތައްވެސް ފަރުމާކުރި ފަރާތެވެ.

ޖޫލްސް ރިމޭ ތަށީގެ ތާރީޚު

1930 ވަނަ އަހަރު ފެށި ފުރަތަމަ ވޯލްޑް ކަޕްގައި ބޭނުންކުރީ ‘ޖޫލްސް ރިމޭ’ ތަށީގެ ނަމުން މަޝްހޫރުވި ތަށިތަކެވެ. ފްރާންސްގެ އަބެލް ލަފްލޫ ފަރުމާކުރި އެ ތަށިން ފެންނަނީ ގްރީކްގެ ކާމިޔާބީގެ ކަލާނގެ ‘ނައިކީ’ އެވެ.

އޭރު އޮތް ގަވާއިދަކީ ތިން ފަހަރަށް މުބާރާތް ކާމިޔާބުކުރާ ގައުމަކަށް އެ ތަށި ދާއިމީކޮށް ދިނުމެވެ. ނަމަވެސް، އެ ތަށި ދެ ފަހަރެއްގެ މަތިން ވަނީ ވަގަށް ނަގާފައެވެ. ފުރަތަމަ ފަހަރު 1966 ގައި އިނގިރޭސިވިލާތުން ވަގަށް ނެގުމުން އެ ތަށި ހޯދީ ‘ޕިކަލްސް’ ނަމަކަށް ކިޔާ ކުއްތާއެކެވެ. ދެވަނަ ފަހަރަށް 1983 ގައި ބްރެޒިލްއިން ވަގަށް ނެގި ގޮތަށް އެ ތަށި އަދިވެސް ނުފެނެއެވެ. ބެލެވޭ ގޮތުގައި އެ ތަށި ވަނީ ވިރުވާލާފައެވެ.

ކާމިޔާބީގެ ބުރަ މަސައްކަތް ރަމްޒުކޮށްދިނުން

ގަޒަނީގާގެ ފަރުމާ ހޮވުނީ 25 ގައުމަކުން ހުށަހެޅި 50 އަށްވުރެ ގިނަ ފަރުމާތަކާ ވާދަކޮށްގެންނެވެ. އޭނާ ހަމައެކަނި ކުރެހުމެއް ހުށަހެޅުމުގެ ބަދަލުގައި، ތަށީގެ އަސްލު ސައިޒުގެ މޮޑެލްއެއް ހުށަހެޅިއެވެ. މީގެ ސަބަބުން ފަނޑިޔާރުންނަށް ތަށީގެ ފުރިހަމަކަން ބަލާލުމަށް ފަސޭހަވިއެވެ.

“ދުނިޔެ އެންމެ މަތީގައި އޮންނައިރު، އޭގެ ތިރިން ފެންނަނީ ކުޅުންތެރިޔާގެ ހަކަތައާއި ހަރަކާތްތެރިކަން. ކުޅުންތެރިޔާގެ ހަށިގަނޑު ކުރެހިފައިވަނީ ބުރަ މަސައްކަތާއި ކާމިޔާބީއަށްޓަކައި ކުރި ހަނގުރާމަ ފެންނާނެ ފަދަ ގޮތަކަށް،” ޖޯޖިއޯ ކިޔައިދިނެވެ.

ޗެމްޕިއަން ޓީމަށް ތަށި މިލްކު ނުކުރެވެނީ ކީއްވެ؟

ފައިނަލް މެޗަށްފަހު އުފުލާލާ އަސްލު ތަށީގެ އުސްމިނުގައި 36 ސެންޓިމީޓަރު ހުންނައިރު، އެ ތަށި ހަދާފައިވަނީ 18 ކެރަޓް ރަނުންނެވެ. ތަށީގެ ތިރީގައި ފެހި ކުލައިގެ ދެ ރިންގު އިންނައިރު، އެއީ ފުޓްބޯޅަ ދަނޑު ރަމްޒުކޮށްދޭ “މަލަކައިޓް” ހިލައެވެ.

މުބާރާތް ކާމިޔާބުކުރާ ޓީމަށް އަސްލު ތަށި ގެންދެވޭނީ ހަމައެކަނި އުފާފާޅުކުރުމުގެ ވަގުތުގައެވެ. އޭގެ ފަހުން އެ ތަށި އަނބުރާ ފީފާއަށް ހަވާލުކުރަން ޖެހެއެވެ. ޗެމްޕިއަން ޓީމަށް ލިބޭނީ ރަންގަލްއި ކުރި ކޮޕީ ނުވަތަ ރެޕްލިކާ ތަށިއެކެވެ. މިހާރުގެ ގަވާއިދު ބުނާގޮތުން ތިން ފަހަރު މުބާރާތް ކާމިޔާބު ކުރިޔަސް އަސްލު ތަށި އެ ގައުމަކަށް މިލްކެއް ނުކުރެވޭނެއެވެ.

ގަޒަނީގާ ފަރުމާކުރި މި ތަށި އެންމެ ފުރަތަމަ އުފުލާލީ 1974 ވަނަ އަހަރު ވެސްޓް ޖާމަނީގެ ކެޕްޓަން ފްރާންޒް ބެކެންބާއުއާއެވެ. އެ ދުވަހުން ފެށިގެން މިއަދާ ހަމައަށްވެސް މިއީ ފުޓްބޯޅައިގެ އެންމެ ޝަރަފުވެރި ރަމްޒެވެ.