ޝައިޚް މުޙައްމަދު ޞިއްދީޤް އަލްމިންޝާވީ އަވަހާރަވުމުގެ ހަތަރު އަހަރު ކުރިން

1966 މާރިޗު 2 ވަނަ ދުވަހު އެމަނިކުފާނު ފޮނުއްވި ސިޓީގައި ވަނީ މިފަދައިންނެވެ:

”ޘަޤާފީ ޕުރޮގްރާމްތަކާބެހޭ ޖެނެރަލް ކޮންޓްރޯލަރަށް، اَلسَّلاَمْ عَلَيْــــــــــــــــــــكُمْ وَ رَحْمَةُ اللَّه وَبَرَكَاتُهُ. އަޅުގަނޑުގެ އަޑުން ’ޙަފްޞް އަން އާޞިމް‘ ގެ ރިވާޔަތަށް ރެކޯޑްކޮށްފައިވާ ޚަތިމް އަޑުއަހައިފީމެވެ. މި ޚަތިމް ރެކޯޑްކުރުމުގެ އަސްލު މަޤްޞަދު އެންމެ ފުރިހަމަ ގޮތުގައި ޙާޞިލުކުރުމަށްޓަކައި، ތިރީގައި ބަޔާންކޮށްފައިވާ ކެސެޓްތައް އަލުން ރެކޯޑްކުރުމަކީ މުހިންމު ކަމެއް ކަމަށް އަޅުގަނޑަށް ފެނެއެވެ. މި މަސައްކަތަށް އެއްވެސް އުޖޫރައެއް އަޅުގަނޑު ބޭނުމެއް ނޫނެވެ. އަދި ރިވިއު ކޮމިޓީގެ އެންމެހައި ޚަރަދުތަކަކީ ވެސް އަޅުގަނޑުގެ އަމިއްލަ ޒިންމާއެއް ކަމުގައި ދަންނަވަމެވެ. އެހެންކަމުން، މި ރެކޯޑިންގްތައް ނިންމުމަށްޓަކައި ސްޓޫޑިއޯއެއް ހަމަޖައްސަވައިދެއްވުމަށް އެދި އިޙްތިރާމާއެކު ދަންނަވަމެވެ. މުޙައްމަދު ޞިއްދީޤް އަލްމިންޝާވީ، 2 މާރިޗު 1966.“

މަސައްކަތް ފުރިހަމަކުރުމަށް ޝައިޚް ކުރެއްވި މި އިޚްލާޞްތެރި މަސައްކަތް ބަލައިގަނެ، ކޮމިޓީން އެ ހުއްދަ ދިނެވެ. 1967 އޯގަސްޓް 19 ގައި، އަލުން ރެކޯޑްކުރި ހުރިހާ ކެސެޓެއް ކޮމިޓީން އަޑުއަހައި، އެތަކެތި ފާސްކޮށް ތަޢުރީފުކުރިއެވެ. އެއަށްފަހު އެ ރެކޯޑިންގްތައް އަރުޝީފުގައި ރައްކާކުރެވުނެވެ.

ވޭތުވެދިޔަ ފަސްދޮޅަސް އަހަރު ދުނިޔޭގެ މީސްތަކުން އަޑުއަހަމުން ދިޔައީ، ޝައިޚް މިންޝާވީގެ ހިތްޕުޅު އެންމެ ބޮޑަށް ހަމަނުޖެހޭ ރެކޯޑިންގްއެވެ. އަލުން ރެކޯޑްކުރި ކެސެޓްތައް އަރުޝީފުގެ ދަފްތަރެއްގެ ތެރެއިން ފެނުނީ ވަރަށް ފަހުންނެވެ. މިކަމާ ގުޅޭގޮތުން މިޞްރުގެ ’ޤުރުއާން ރޭޑިއޯ‘ ނެޓްވޯކްގެ ޑިރެކްޓަރު ވިދާޅުވީ، ކުރީގެ ރެކޯޑިންގްގައި އެއްވެސް ގޯހެއް ނެތް ކަމަށާއި، މީސްތަކުން އެ ރެކޯޑިންގް ބަލައިގަނެފައިވާ ކަމަށެވެ. ނަމަވެސް، ޝައިޚް މިންޝާވީ އެދިވަޑައިގަތީ ހަމައެކަނި މީސްތަކުންގެ ބަލައިގަތުމަކަށް ނޫނެވެ. އެމަނިކުފާނު އެދިވަޑައިގަތީ ﷲގެ ކަލާމްފުޅު ފޯރުކޮށްދިނުމުގައި ’އިޙްސާންތެރިކަން‘ (އެންމެ ފުރިހަމަ ގޮތުގައި އަދާކުރުން) އިސްކުރުމަށެވެ.

މިހާރު މިޞްރުގެ ’ޤުރުއާން ރޭޑިއޯ‘ އިން ވަނީ ޝައިޚް މިންޝާވީ އެންމެ ފުރިހަމަ ކަމަށް ދެކެވަޑައިގެންނެވި އެ ރެކޯޑިންގްތައް ފޮނުވަން ފަށާފައެވެ. އެ މާތް އަޑުފުޅުން މިއަދު އަޅުގަނޑުމެންނަށް އެ ފުރިހަމަކަން އިޙްސާސްކުރެވެއެވެ.

ﷲ ތަޢާލާ އެމަނިކުފާނަށް ރަޙްމަތްލައްވައި، ކިޔަވައިދެއްވި ކޮންމެ އަކުރަކަށް ހެޔޮ ޖަޒާ ދެއްވާށިއެވެ. ޖަންނަތުލް ފިރުދައުސްގައި ލައްވަވާށިއެވެ. އާމީން.