ގަން ހިމެނޭހެން 8 ރަށެއްގައި އާސަންދަ ކައުންޓަރުތަކެއް ހުޅުވައިފި
Gan himeneyhen 8 rashehgai aasandhan counter thakeh hulhuvaifi
އާސަންދައިގެ ޚިދުމަތް ރައްޔިތުންނަށް ފަސޭހަކަމާއެކު ހޯދޭނެ މަގު ފަހިކުރުމަށް ސަރުކާރުން ކުރަމުންދާ މަސައްކަތުގެ ދަށުން، ރާއްޖޭގެ އިތުރު 8 ރަށެއްގައި އާސަންދަ ކައުންޓަރުތައް ހުޅުވައިފިއެވެ. މިއާއެކު އާސަންދަ ކައުންޓަރުތަކުގެ ޚިދުމަތް މިހާރު ރާއްޖޭގެ 11 އަތޮޅަކުން ލިބިގެންދާނެއެވެ.
އަލަށް ކައުންޓަރުތައް ހުޅުވި ރަށްތައް
އާސަންދަ ކުންފުނިން މަޢުލޫމާތު ދެއްވި ގޮތުގައި، އަލަށް ވިރަ ކައުންޓަރުތައް ހުޅުވާފައިވަނީ ރ. އުނގޫފާރު، ބ. އޭދަފުށި، ޅ. ނައިފަރު، އދ. މަހިބަދޫ، ލ. ގަން، ގދ. ތިނަދޫ، ޏ. ފުވައްމުލައް އަދި ދ. ކުޑަހުވަދޫ ގައެވެ. މި ކައުންޓަރުތަކުގެ ސަބަބުން އަތޮޅުތަކުގެ ރައްޔިތުންނަށް ރަށުން ބޭރަށް ނުގޮސް އާސަންދައިގެ ޚިދުމަތްތައް ހޯދުމުގެ ފުރުސަތު ފަހިވެގެންދާނެއެވެ.
މި ކައުންޓަރުތަކުން ބޭސްފަރުވާއަށް އެހީއަށް އެދުމާއި، ކުންފުންޏާ ގުޅުންހުރި އިދާރީ ކަންކަން ނިންމުމުގެ އިތުރުން، އާސަންދައިގެ ޚިދުމަތްތަކާ ގުޅޭ މަޢުލޫމާތު ސާފުކުރުމުގެ ފަސޭހަކަން ރައްޔިތުންނަށް ލިބޭނެއެވެ. މީގެކުރިން އާސަންދަ ވިރަ ކައުންޓަރުގެ ޚިދުމަތް ދެމުން އައީ މާލެ، ހުޅުމާލެ، ފ. ނިލަންދޫ، އައްޑޫ ސިޓީ އަދި ކުޅުދުއްފުށި ސިޓީގައެވެ.
ޑިޖިޓަލް ޚިދުމަތްތަކަށް އިސްކަންދިނުން
ކައުންޓަރުތަކުގެ އިތުރުން، އާސަންދައިގެ ޚިދުމަތްތަކަށް އެދުމަށް ފަސޭހަކުރުމުގެ ގޮތުން ’މައި އާސަންދަ ޕޯޓަލް‘ ގެ ނަމުގައި ޚާއްސަ އެޕްލިކޭޝަނެއްވެސް ވަނީ ތަޢާރަފުކޮށްފައެވެ. މި ޕޯޓަލް މެދުވެރިކޮށް އާސަންދައިން ފޯރުކޮށްދޭ ގިނަ ޚިދުމަތްތަކެއް އޮންލައިންކޮށް ލިބޭނެ އިންތިޒާމު މިހާރު ވަނީ ހަމަޖެހިފައެވެ.
އީފާސް (eFaas) މެދުވެރިކޮށް މި ޕޯޓަލްއަށް ވަދެވޭއިރު، ބަލިމީހާގެ ފަރާތުން ކޮންމެ އެހީތެރިއަކަށްވެސް ފޯމު ހުށަހެޅުމުގެ ފުރުސަތު އޮންނާނެ ކަމަށް އާސަންދަ ކުންފުނިން ވިދާޅުވެއެވެ. މިއީ ރައްޔިތުންނާ ވީހާވެސް ގާތުން އަދި ލުއިފަސޭހަކަމާއެކު ޚިދުމަތް ފޯރުކޮށްދިނުމަށް ސަރުކާރުން ގެންގުޅުއްވާ ސިޔާސަތުގެ ދަށުން ކުރެވުނު މުހިންމު މަސައްކަތެކެވެ.
