މަޝްރޫޢުތަކަށް ބޭނުންވާ ސާމާނު ލިބުމުގެ ދަތިތައް ކުރިއަށް އޮތް 4 މަހުގެ ތެރޭގައި ހައްލުކުރަނީ
Mashroouthakah beynunvaa saamaanu libumuge dhathithah kuriah oiy mahuge thereygai hallukuranee
ރަށްރަށުގައި ކުރިއަށްގެންދާ ތަރައްޤީގެ މަޝްރޫޢުތަކުގެ ދުވެލި އަވަސްކުރުމަށްޓަކައި، އެ މަސައްކަތްތަކަށް ބޭނުންވާ ސާމާނު ލިބުމުގައި ހުރި ދަތިތައް ކުރިއަށް އޮތް ހަތަރު މަސްދުވަހުގެ ތެރޭގައި ހައްލުކުރެވޭނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ މެނޭޖިންގ ޑިރެކްޓަރ އަޙްމަދު ސަޢުދީ ވިދާޅުވެއްޖެއެވެ.
ޕީއެސްއެމް ނިއުސްއަށް ދެއްވި އިންޓަވިއުއެއްގައި ސަޢުދީ ވިދާޅުވީ، އެމްޓީސީސީއާ ހަވާލުކޮށްފައިވާ ގިނަ މަޝްރޫޢުތަކެއްގެ ތެރޭގައި ބިން ހިއްކުމުގެ މަސައްކަތްތައް ހިމެނޭ ކަމަށެވެ. މި ވަގުތު މަހާ ޖައްރާފާއާއެކު ޖުމްލަ 6 ޑްރެޖަރެއް ބޭނުންކޮށްގެން އެކި ރަށްރަށުގައި ބިން ހިއްކުމުގެ މަސައްކަތް ކުރިއަށްދާކަން އޭނާ ފާހަގަކުރެއްވިއެވެ. އެގޮތުން ކަޓަރ ސަކްޝަން ޑްރެޖަރު ބޭނުންކޮށްގެން ބ. ތުޅާދޫއާއި ލ. މާވައް ހިއްކަމުންދާއިރު، ގިރިފުށި ހިއްކުމަށް މަހާ ޖައްރާފް ދަނީ ބޭނުންކުރަމުންނެވެ. މީގެ އިތުރުން މަޑަވެއްޔާއި ފަރެސްމާތޮޑާ ހިއްކުމުގެ މަސައްކަތްވެސް ކުރިއަށްދާނެއެވެ.
ބިން ހިއްކުމުގެ މަޝްރޫޢުތަކަށް ހުރި ގޮންޖެހުންތައް
ސަޢުދީ ވިދާޅުވި ގޮތުގައި ހޮޕާ ޑްރެޖަރަކުން އިތުރު 16 މިލިއަން ސީބީއެމްގެ ބިން ހިއްކަން އެބައޮތެވެ. އެކަން ކުރުމަށްޓަކައި އިތުރު ޑްރެޖަރެއް ކުއްޔަށް ނަގަންޖެހޭއިރު، 10 މަސްދުވަހަށް ޑްރެޖަރެއް ކުއްޔަށް ނެގިނަމަވެސް 105 މިލިއަން ޑޮލަރު ބޭރުގެ ކުންފުންޏަކަށް ދައްކަންޖެހެއެވެ. “މިއީ ބޮޑު ގޮންޖެހުމެއް ނަމަވެސް، ބިން ހިއްކުމުގެ މަސައްކަތްތައް ނިންމުމަށް ޕްލޭންތަކެއް ހަދައިގެން މަސައްކަތް ކުރަމުންދަނީ،” ސަޢުދީ ވިދާޅުވިއެވެ.
އެއަރޕޯޓް މަޝްރޫޢުތަކުގެ ސްކޯޕަށް އައި ބަދަލުތައް
އެއަރޕޯޓްތައް ތަރައްޤީކުރުމުގެ މަޝްރޫޢުތަކަށް އަލިއަޅުވާލައްވަމުން ސަޢުދީ ވިދާޅުވީ، މަސައްކަތް ލަސްވާ އެއް ސަބަބަކީ މަޝްރޫޢު ފެށުމަށްފަހު ސްކޯޕަށް އަންނަ ބަދަލުތައް ކަމަށެވެ. ޚާއްޞަކޮށް މޯލްޑިވިއަންއިން ބޭނުންކުރާ ފްލައިޓްތަކުގެ ސައިޒު ބޮޑުވުމާ ގުޅިގެން، ރަންވޭތައް ކުރިން ކަނޑައެޅި ވަރަށްވުރެ ބޮޑުކުރަން ޖެހިފައިވާކަން އޭނާ ފާހަގަކުރެއްވިއެވެ. މިގޮތުން ރ. އަލިފުށީ އެއަރޕޯޓްގެ މަސައްކަތްވެސް ސްކޯޕަށް އައި ބަދަލުތަކާއެކު އައު މަޝްރޫޢެއްގެ ގޮތުގައި ފެށުމަށް މިހާރު ދަނީ ތައްޔާރުވަމުންނެވެ.
ސިއްޙީ ދާއިރާގެ މަޝްރޫޢުތަކާއި ކުރިމަގު
އެމްޓީސީސީއާ ހަވާލުކޮށްފައިވާ ސިއްޙީ މަރުކަޒުތަކާއި ހޮސްޕިޓަލްތަކުގެ މަޝްރޫޢުތަކުގެ ތެރެއިން ގިނަ މަސައްކަތްތަކެއް އަންނަ އަހަރުގެ ނިޔަލަށް ނިންމަން ޖެހެއެވެ. ސަޢުދީ ވިދާޅުވީ މި މަޝްރޫޢުތަކަށް ބޭނުންވާ މެޓީރިއަލްތައް މިހާރު ދެނެގަނެވިފައިވާ ކަމަށާއި، ކުރިއަށް އޮތް 3 ނުވަތަ 4 މަސްދުވަހުގެ ތެރޭގައި ސާމާނު ހޯދުމުގައި ހުރި ހުރަސްތައް ނައްތާލެވޭނެ ކަމަށެވެ. މިއާއެކު އަތޮޅުތެރޭގައި ހިނގަމުންދާ ހުރިހާ މަޝްރޫޢުތަކެއްގެ ދުވެލި ބާރުވެގެންދާނެ ކަމަށް އެމްޓީސީސީން އުންމީދު ކުރެއެވެ.
