ގަމުގެ 4 ސަރަޙައްދެއްގައި އިމާރާތްކުރާ ބަސް ސްޓޮޕް ޑިޒައިން ކުރުމުގެ ފުރުސަތު ޢާންމުކޮށް ހުޅުވާލައިފި
Gamuge 4 sarahahdhehgai imaaraaikuraa bus stop design kurumuge furusathu aanmukoh hulhuvaalaifi
ލ. ގަމުގެ ހަތަރު ސަރަޙައްދެއްގައި ބަސް ސްޓޮޕްތަކެއް އިމާރާތްކުރުމަށްޓަކައި، އެ ތަންތަން ޑިޒައިން ކުރުމުގެ ފުރުސަތު ޢާންމުކޮށް ހުޅުވާލައިފިއެވެ. ގަމު ކައުންސިލުން ނިންމާފައިވަނީ ހުށަހަޅާ ކުރެހުންތަކުގެ ތެރެއިން އެންމެ ރަނގަޅު ތިން ކުރެހުމަކަށް ފައިސާގެ އިނާމު ދިނުމަށެވެ.
އިނާމު ދިނުމަށް ހަމަޖެހިފައިވާ ގޮތް
ކައުންސިލުން ހާމަކޮށްފައިވާ ގޮތުގައި، ހުށަހަޅާ ޑިޒައިންތަކުގެ ތެރެއިން އެއްވަނައަށް ހޮވޭ ކުރެހުމަކަށް 3,000 ރުފިޔާ، ދެވަނައަށް ހޮވޭ ކުރެހުމަކަށް 1,500 ރުފިޔާ އަދި ތިންވަނައަށް ހޮވޭ ކުރެހުމަކަށް 500 ރުފިޔާގެ އިނާމެއް ދިނުމަށް ވަނީ ހަމަޖެހިފައެވެ.
މަޢުލޫމާތު ދިނުމާއި ކުރެހުން ހުށަހެޅުން
މި މަސައްކަތާ ގުޅޭގޮތުން މަޢުލޫމާތު ދިނުމުގެ ބައްދަލުވުން އޮންނާނީ 06 އޮގަސްޓް 2026 ވާ ބުރާސްފަތި ދުވަހުގެ ހެނދުނު 10:00 ގައި ކައުންސިލް އިދާރާގެ ސެމިނަރ ރޫމްގައެވެ. އެ ވަގުތަށް ހާޟިރުނުވެވޭ ފަރާތްތަކަށް އެ ދުވަހުގެ މެންދުރު 13:00 އާއި 13:25 އާ ދެމެދު ކައުންސިލްގެ ނަންބަރު 7251515 އަށް ގުޅައިގެން މަޢުލޫމާތު ސާފުކުރުމުގެ ފުރުސަތު ވަނީ ހުޅުވާލާފައެވެ.
ބަސް ސްޓޮޕްތަކުގެ ކުރެހުންތައް ނިންމައި ހުށަހަޅަންޖެހެނީ 11 އޮގަސްޓް 2026 ވާ އަންގާރަ ދުވަހުގެ މެންދުރުފަހު 13:30 އަށެވެ. ކުރެހުންތައް ހުށަހަޅަންވާނީ ކައުންސިލް އިދާރާގެ ސެމިނަރ ރޫމަށެވެ.
ހުށަހަޅަންޖެހޭ ތަކެތި
ކުރެހުން ހުށަހަޅާ ފަރާތްތަކުން ކުރެހުމުގެ ހާޑްކޮޕީ ކުލަކޮށް ހުށަހަޅަންވާނެއެވެ. އަދި ވަނަވަނައަށް ހޮވޭ ތިން ފަރާތުން ހާޑްކޮޕީގެ އިތުރުން ކުރެހުމުގެ ސޮފްޓް ކޮޕީ ވެސް ކައުންސިލާ ޙަވާލުކުރަންވާނެ ކަމަށް އެ އިދާރާއިން މަޢުލޫމާތު ދެއެވެ.
