ލާމު އެލްޖީއޭގެ ތެރެއިން ހިންގި ވަގު ރެޖިސްޓްރޭޝަންގެ މައްސަލަތަކެއް ބަލަން ފަށައިފި

ލާމު އަތޮޅު ކައުންސިލް (ލ. އެލްޖީއޭ ބްރާންޗް) ގެ ތެރެއިން ގަވާއިދާ ހިލާފަށް ގިނަ އަދަދެއްގެ އެއްގަމު އުޅަނދުގެ ވަގު ރެޖިސްޓްރޭޝަން ހެދި މައްސަލަތަކެއް ފެންމަތިވެ، އެ މައްސަލަ ފުލުހުން ބަލަން ފަށައިފިއެވެ. މި މައްސަލަ ފުލުހަށް ހުށަހަޅާފައިވާ ކަމަށާއި މައްސަލައިގެ ތަހުގީގު ކުރިއަށްދާ ކަމަށް ފުލުހުން ވަނީ ޔަގީންކޮށްދީފައެވެ.

މައުލޫމާތު ލިބިފައިވާ ގޮތުގައި ޕޯޓަލް މެދުވެރިކޮށް ރެޖިސްޓްރޭޝަންގެ މަސައްކަތް ނިންމުމަށް ދެ މުވައްޒަފެއްގެ ލޮގިން ބޭނުންވެއެވެ. ނަމަވެސް މި މައްސަލައިގައި ކަން ހިނގާފައިވަނީ މުވައްޒަފަކު ޗުއްޓީގައި ހުއްޓާ، އޭނާގެ ލޮގިން ބޭނުންކޮށްގެން ކަމަށް ވެއެވެ. މިކަން ފާހަގަކުރެވުމާ ގުޅިގެން، އެ މުވައްޒަފު ވަނީ މިދިޔަ ސެޕްޓެމްބަރު މަހުގެ 9 ވަނަ ދުވަހު ލ.ފޮނަދޫ ޕޮލިސް ސްޓޭޝަނަށް މި މައްސަލަ ރަސްމީކޮށް ހުށަހަޅާފައެވެ.

ލާމު އަތޮޅު ކައުންސިލުން 3 ދުވަސްތެރޭ 70 އަށްވުރެ ގިނަ ވަގު ރެޖިސްޓްރޭޝަން ހަދާފައިވާ ކަމަށް ވަނީ މައުލޫމާތު ލިބިފައެވެ. މި މައްސަލަ ފެންމަތިވުމާ ގުޅިގެން އެ އިދާރާގެ ހުރިހާ ލޮގިންތަކެއް މިހާރު ވަނީ ސަސްޕެންޑްކޮށް، ބޭނުން ނުކުރެވޭ ގޮތް ހަދާފައެވެ. މިކަމާއި ގުޅުން ހުރި މުއައްޒިފުން މަސައްކަތުން އެކަހެރި ކޮށްފައި ކަމަަށްވެސް ލާމު އެމްވީއަށް ވަނީ މައުލޫމާތު ލިބިފައެވެ. އަދި ޓްރާންސްޕޯޓް މިނިސްޓްރީން ވަނީ އަތޮޅު ކައުންސިލުން ކުރިއަށްގެންދާ ރެޖިސްޓްރޭޝަންގެ ހުރިހާ މަސައްކަތްތަކެއް މިހާރު ހުއްޓުވާފައެވެ.

މިކަމާ ގުޅޭގޮތުން ހައްދުންމަތީ އެލްޖީއޭ ބްރާންޗްގެ އެކްޒެކެޓިވް ހުސެއިން ޙަބީބް ވިދާޅުވީ، އެ ބްރާންޗުން މިފަދަ މައްސަލައެއް ހުށަހަޅާފައި ނުވާ ކަމަށާއި، މިފަދަ މައްސަލައެއް އުޅޭކަން އެނގިފައި ނުވާ ކަމަށްވެސް އޭނާ ވިދާޅުވިއެވެ.