ޓީމޫ އަދި ޝެއިން ފަދަ ސައިޓުތަކުން ކުރެވޭ މުއާމަލާތްތަކަށް ބީއެމްއެލްއިން ލިމިޓެއް ކަނޑައަޅައިފި

ޓީމޫ އަދި ޝެއިން ފަދަ ސައިޓުތަކުން ކުރެވޭ މުއާމަލާތްތަކަށް ބީއެމްއެލްއިން، މަހެއްގެ މައްޗަށް ކުރެވޭނެ މުއާމަލާތުގެ އަދަދު 30 އަށް ލިމިޓްކުރުމަށް ނިންމައިފިއެވެ.ބޭންކުން މި ބަދަލު ގެނައީ، އާންމު ފަރާތްތަކުގެ ޒަރޫރީ ބޭނުންތަކަށް ދޫކޮށްފައިވާ ޑޮލަރު ލިމިޓް ބޭނުންކޮށްގެން، ބައެއް ފަރާތްތަކުން ވިޔަފާރި އުސޫލުން ގިނަ އަދަދެއްގެ މުދާ އޯޑަރުކުރަމުންދާތީއެވެ. މިކަމުގެ ސަބަބުން ބޭންކުގެ ޑޮލަރުގެ ރިޒާވަށް ބޮޑު ޕްރެޝަރެއް ކުރިމަތިވަމުންދާ ކަމަށް ބޭންކުން ވަނީ ފާހަގަކޮށްފައެވެ.

މި އާ އުސޫލުގެ ދަށުން، ކާޑުތަކަށް ކަނޑައެޅިފައިވާ މަހު ޑޮލަރު ލިމިޓަށް (މިސާލަކަށް 250 ޑޮލަރު) އެއްވެސް ބަދަލެއް ނާންނާނެއެވެ. ނަމަވެސް، އެ ލިމިޓްގެ ތެރެއިން، ޓީމޫ އަދި ޝެއިން ފަދަ ސައިޓްތަކުން މަހެއްގެ މައްޗަށް ކުރެވޭނީ ގިނަވެގެން 30 މުއާމަލާތް) އެވެ.

ބޭންކުން ބުނި ގޮތުގައި، މިއީ ޑޮލަރުގެ ނަހަމަ ބޭނުންކުރުން ހުއްޓުވައި، ލިބެންހުރި ބޭރު ފައިސާ އެންމެ ބޭނުންޖެހިފައިވާ ޒަރޫރީ ކަންކަމަށް ހަމަހަމަކަމާއެކު ފޯރުކޮށްދިނުމަށް އެޅި މުހިންމު ފިޔަވަޅެކެވެ.