އެޗްޑީސީ އެޕްރެންޓިސްޝިޕް ޕްރޮގްރާމުގައި ބައިވެރިވާން ހުޅުވާލައިފި

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރިއަށްގެންދާ އެޕްރެންޓިސްޝިޕް ޕްރޮގްރާމުގައި ބައިވެރިވުމުގެ ފުރުސަތު މިއަހަރަށް ހުޅުވާލައިފިއެވެ. މިއީ ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާބެހޭ ވުޒާރާއާ ގުޅިގެން އެ ކުންފުނިން ކޮންމެ އަހަރަކުވެސް ސިލްސިލާކޮށް ކުރިއަށްގެންދާ ޕްރޮގްރާމެކެވެ.

ޒުވާނުންނަށް ވަޒީފާގެ މާހައުލުގެ ހުނަރުތައް ދަސްކޮށްދީ، ޤާބިލު ޒުވާނުން އުފެއްދުމުގެ މަޤްސަދުގައި ހިންގާ މި ޕްރޮގްރާމުގައި ބައިވެރިވެވޭނީ 18 އަހަރާއި 35 އަހަރާ ދެމެދުގެ ދިވެހި ޒުވާނުންނަށެވެ. މި ޕްރޮގްރާމުގައި ބައިވެރިވުމަށް އެދޭ ފަރާތްތަކުން މި މަހުގެ ނިޔަލަށް އޮންލައިންކޮށް ފޯމު ހުށަހެޅުމުގެ ފުރުސަތު މިހާރު ވަނީ ހުޅުވާލާފައެވެ.

މިއަހަރު ތަމްރީނު ދޭ ދާއިރާތައް

އެޗްޑީސީން މަޢުލޫމާތު ދޭ ގޮތުގައި މިއަހަރުގެ ޕްރޮގްރާމުގައި ތިން ދާއިރާއަކުން ތަމްރީނު ދިނުމަށް ވަނީ ހަމަޖެހިފައެވެ. އެ ދާއިރާތަކަކީ:

• ހެލްތު އެންޑް ސޭފްޓީ އިން ކޮންސްޓްރަކްޝަން
• ކޮމްޕިއުޓާ ހާޑްވެއާ އެންޑް ނެޓްވޯކިން
• ސާވޭއިން ޓެކްނީޝަން

ޖުމްލަ ހަ މަސްދުވަހުގެ މުއްދަތަށް ކުރިއަށްގެންދާ މި ޕްރޮގްރާމް ފުރިހަމަކުރާ ބައިވެރިންނަށް އެ ދާއިރާއަކުން ލެވެލް 3 ގެ ސަނަދެއް ލިބިގެންދާނެއެވެ. މީގެ އިތުރުން، ޕްރޮގްރާމުގައި ބައިވެރިވާ ކޮންމެ ކުއްޖަކަށް އިނާޔަތެއްގެ ގޮތުގައި މަހަކު 6,000 ރުފިޔާ ދިނުމަށް ވަނީ ނިންމާފައެވެ.

މި ޕްރޮގްރާމުގެ އަމަލީ މަސައްކަތްތައް ފެށުމަށް ހަމަޖެހިފައިވަނީ އަންނަ އޮގަސްޓު މަހުގެ ތެރޭގައެވެ. މިއީ ވަޒީފާގެ ބާޒާރަށް ނުކުންނަން ބޭނުންވާ ޒުވާނުންނަށް ބޭނުންވާ ތަމްރީނާއި ތަޖުރިބާ ހޯދުމަށް ލިބިގެންދާ ރަނގަޅު ފުރުސަތެއް ކަމަށް އެޗްޑީސީން ފާހަގަކުރެއެވެ.