މިއަހަރުގެ މިހާތަނަށް 1.2 މިލިޔަން ފަތުރުވެރިން ރާއްޖެއަށް ޒިޔާރަތްކޮށްފި
Miaharuge mihaathanah 1.2 million fathuruverin rajje ah ziyaaraikohffi
މިއަހަރުގެ މިހާތަނަށް ރާއްޖެއަށް 1.2 މިލިޔަން ފަތުރުވެރިން ޒިޔާރާތްކޮށްފައިވާ ކަމަށް ފަތުރުވެރިކަމާއި މަދަނީ އުދުހުންތަކާ ބެހޭ ވުޒާރާގެ އެންމެ ފަހުގެ ތަފާސްހިސާބުތަކުން ދައްކައިފިއެވެ.
ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ މައުލޫމާތުތަކަށް ބަލާއިރު، އަހަރުގެ މިހާތަނަށް ރާއްޖެއަށް މުޅި ޖުމްލަ 1,229,419 ފަތުރުވެރިން ވަނީ ޒިޔާރާތްކޮށްފައެވެ.
މިދިޔަ އަހަރުގެ މި މުއްދަތުގައި ރާއްޖެއަށް 1,287,850 ފަތުރުވެރިން ޒިޔާރަތްކޮށްފައިވާއިރު، މިއަހަރުގެ މިހާތަނަށް ފެންނަނީ 4.5 އިންސައްތައިގެ ދަށްވުމެކެވެ. އަދި ހިނގަމުންދާ ޖުލައި މަހުގެ މިހާތަނަށް 159,537 ފަތުރުވެރިން ޒިޔާރާތްކޮށްފައިވާއިރު، މިއީ މިދިޔަ އަހަރުގެ ޖުލައި މަހުގެ މި މުއްދަތާ އަޅާބަލާއިރު 1.3 އިންސައްތަ ދަށް އަދަދެކެވެ. ތަފާސްހިސާބުތަކުން ދައްކާގޮތުގައި މިހާރު ރާއްޖެއަށް އެވްރެޖްކޮށް ކޮންމެ ދުވަހަކު 5,911 ފަތުރުވެރިން ޒިޔާރާތްކުރެއެވެ.
ފަތުރުވެރިންގެ އަދަދު ދަށްވި ސަބަބުތައް
ފަތުރުވެރިންގެ އަދަދު މިދިޔަ އަހަރާ އަޅާބަލާއިރު ދަށްވުމުގެ މައިގަނޑު ސަބަބެއްގެ ގޮތުގައި ފާހަގަކުރެވެނީ މެދުއިރުމަތީގައި ހިނގަމުންދާ ހަނގުރާމައެވެ. މީގެ ސަބަބުން ރާއްޖެއަށް ދަތުރުކުރާ ގިނަ އެއަރލައިންތަކެއްގެ ދަތުރުތައް ވަގުތީގޮތުން ހުއްޓާލުމާ ގުޅިގެން ފަތުރުވެރިންނަށް ރާއްޖެ އައުމުގައި ދަތިތަކާ ކުރިމަތިވިއެވެ. ނަމަވެސް، ދަތުރުތައް މެދުކަނޑާލި އެއާލައިންތަކުން އަލުން ދަތުރުތައް ފެށުމާއެކު، މިހާރު ފަތުރުވެރިން އަންނަ އަދަދު އިތުރުވަމުންދާކަން ފާހަގަކުރެވެއެވެ.
އެންމެ ގިނައިން ފަތުރުވެރިން އަންނަ ގައުމުތައް
ރާއްޖެއަށް މިހާރު އެންމެ ގިނައިން ފަތުރުވެރިން ޒިޔާރަތްކުރާ ފަސް ގައުމަކީ:
- ޗައިނާ: 210,109 ފަތުރުވެރިން
- ރަޝިއާ: 175,814 ފަތުރުވެރިން
- އިނގިރޭސިވިލާތް: 96,179 ފަތުރުވެރިން
- އިޓަލީވިލާތް: 78,982 ފަތުރުވެރިން
- ޖަރުމަނުވިލާތް: 75,550 ފަތުރުވެރިން
ދަތުރުފަތުރުގެ ތަފްސީލު
މިއަހަރު ޒިޔާރަތްކުރި ފަތުރުވެރިންގެ ތެރެއިން 1,213,842 ފަތުރުވެރިން ރާއްޖެ އައިސްފައިވަނީ ވައިގެ މަގުންނެވެ. މީގެ ތެރެއިން 1,199,442 ފަތުރުވެރިން ވެލާނާ އިންޓާނޭޝަނަލް އެއާޕޯޓުން އެތެރެވެފައިވާއިރު، ދެވަނައަށް އެންމެ ގިނަ ފަތުރުވެރިން އެތެރެވީ އައްޑޫ ސިޓީގެ ގަން އިންޓާނޭޝަނަލް އެއާޕޯޓުންނެވެ. އެއީ ޖުމްލަ 4,475 ފަތުރުވެރިންނެވެ.
މިދިޔަ އަހަރު ރާއްޖެއަށް ޖުމްލަ 2.2 މިލިޔަން ފަތުރުވެރިން ޒިޔާރަތްކޮށްފައިވާއިރު، ފަތުރުވެރިކަމާ ބެހޭ ވަޒީރު ވަނީ މިއަހަރުގެ ނިޔަލަށް ފަތުރުވެރިންގެ އަދަދު މިދިޔަ އަހަރަށް ވުރެ ދަށް ނުވާނެ ކަމުގެ ޔަޤީންކަން ދެއްވާފައެވެ. ސަރުކާރުން މިހާރު ދަނީ ފަތުރުވެރިކަމުގެ ކުރިއެރުން ދެމެހެއްޓުމަށް ގިނަ މަސައްކަތްތަކެއް ކުރަމުންނެވެ.
