ހޮސްޕިޓަލުތަކުގެ އައިނު ފިހާރަތަކުން 23،800 އަށްވުރެ ގިނަ އައިނު ދޫކޮށްފި

ސަރުކާރު ހޮސްޕިޓަލުތަކުގައި ޤާއިމުކޮށްފައިވާ “އެމްސީޖީއެޗް އޮޕްޓިކަލްސް” ފިހާރަތަކުން މިހާތަނަށް 23،847 އައިނު ހައްދާފައިވާ ކަމަށް މާލެ ސިޓީ ގްރޫޕް އޮފް ހޮސްޕިޓަލްސް (އެމްސީޖީއެޗް) އިން ހާމަކޮށްފިއެވެ. މިއީ ރައްޔިތުންގެ ޖީބަށް ލުއިވާނެހެން، ނަންބަރު އައިނު ހެއްދުމުގެ ޚިދުމަތް ފަސޭހަކަމާއެކު ފޯރުކޮށްދިނުމަށް ސަރުކާރުން ކުރަމުންދާ މަސައްކަތުގެ ދަށުން ލިބިފައިވާ ބޮޑު ކުރިއެރުމެކެވެ.

ޕީއެސްއެމް ނިއުސްއަށް މައުލޫމާތު ދެއްވަމުން އެމްސީޖީއެޗުން ވިދާޅުވީ، މިހާތަނަށް އެމްސީޖީއެޗް އޮޕްޓިކަލްސްގެ ޚިދުމަތް ރާއްޖޭގެ ހަތަރު ހޮސްޕިޓަލެއްގައި ފޯރުކޮށްދެމުންދާ ކަމަށެވެ. އެއީ އައިޖީއެމްއެޗް، ހުޅުމާލެ ހޮސްޕިޓަލް، އައްޑޫ އިކުއެޓޯރިއަލް ހޮސްޕިޓަލް އަދި ކުޅުދުއްފުށީ ރީޖަނަލް ހޮސްޕިޓަލްގައެވެ. މީގެ ތެރެއިން އެންމެ ގިނަ އައިނު ދޫކޮށްފައިވަނީ އައިޖީއެމްއެޗާއި ހުޅުމާލެ ހޮސްޕިޓަލުންނެވެ.

ތަފާސް ހިސާބުތަކުގެ ތަފްސީލު:

އެމްސީޖީއެޗުން ހިއްސާކުރި ތަފާސް ހިސާބުތަކަށް ބަލާއިރު، އައިޖީއެމްއެޗުން 13,595 އޯޑަރު ލިބި 12,507 އައިނު ވަނީ ހަވާލުކޮށްފައެވެ. ހުޅުމާލެ ހޮސްޕިޓަލުން 8,934 އޯޑަރުގެ ތެރެއިން 8,247 އައިނު ހަވާލުކޮށްފައިވާއިރު، އައްޑޫ އިކުއެޓޯރިއަލް ހޮސްޕިޓަލުން 1,746 އައިނު އަދި ކުޅުދުއްފުށީ ރީޖަނަލް ހޮސްޕިޓަލުން 1,347 އައިނު ވަނީ ހަވާލުކޮށްފައެވެ.

އެމްސީޖީއެޗް އޮޕްޓިކަލްސްގެ ޚިދުމަތަކީ އާސަންދައިގެ ދަށުން އަގު ހެޔޮކޮށް އައިނު ހެއްދުމުގެ ފުރުޞަތު ފަހިކޮށްދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުގެ ދަށުން ފެށި ޚިދުމަތެކެވެ. މި ޚިދުމަތް އިތުރަށް ފުޅާކުރުމުގެ ގޮތުން، 15 ޖެނުއަރީ 2026 އިން ފެށިގެން އަމިއްލަ 18 ތަނަކުން ވެސް ސަރުކާރުގެ އުސޫލުގެ ދަށުން އައިނު ހެއްދުމުގެ ޚިދުމަތް ލިބޭނެކަން އާސަންދަ ކުންފުނިން ވަނީ އިޢުލާންކޮށްފައެވެ.

މީގެ ކުރިން އައިނު ހެއްދުމަށް އާސަންދައިން ދެމުންދިޔައީ ކޮންމެ ދެ އަހަރަކުން 1,000 ރުފިޔާގެ އެހީއެކެވެ. ނަމަވެސް، މިދިޔަ އަހަރުގެ ޖޫން މަހުން ފެށިގެން މި އެހީ ވަނީ 2,000 ރުފިޔާއަށް ބޮޑުކޮށްފައެވެ. މީގެ އިތުރުން، އާސަންދަ ސްކީމުގެ ދަށުން ޚިދުމަތް ދޭ ބައެއް އަމިއްލަ ކްލިނިކްތަކާއި ހޮސްޕިޓަލްތަކުން ވެސް މިހާރު މި ޚިދުމަތް ލިބޭނެ އިންތިޒާމު ވަނީ ހަމަޖައްސާފައެވެ.