ދިރިތި ޕޯޓަލްގެ ޚިދުމަތްތައް ”ވަންގަވް“ އަށް ބަދަލުކުރަނީ

މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން ފޯރުކޮށްދެމުންދާ ”ދިރިތި“ ޕޯޓަލްގެ ޚިދުމަތްތައް، ސަރުކާރުގެ އެކްސެލެންޓް ސަރވިސް ޕޯޓަލް ”ވަންގަވް“ އަށް ބަދަލުކުރުމަށް ނިންމައިފިއެވެ.

ސިއްޙަތާއި އާއިލާއާއި އިޖުތިމާއީ އެހީއާ ބެހޭ ވުޒާރާގެ ދަށުން ހިނގަމުންދާ އެމް.އެފް.ޑީ.އޭ އިން މިއަދު ނެރުނު އިޢުލާނެއްގައި ބުނެފައިވަނީ، އަމިއްލަ ދިރިއުޅުމަށްޓަކައި ކާބޯތަކެތި އުފައްދާ ވިއްކާ ފަރާތްތައް ދަފްތަރުކުރުމަށް ބޭނުންކުރާ ”ދިރިތި“ ޕޯޓަލްގެ ޚިދުމަތްތައް 7 ޖޫން 2026 އިން ފެށިގެން ވަންގަވް ޕޯޓަލްއަށް ބަދަލުވާނެ ކަމަށެވެ.

މި ބަދަލާ ގުޅިގެން، މިއަދު މެންދުރުފަހު 14:00 އިން ފެށިގެން ދިރިތި ޕޯޓަލްގެ ޚިދުމަތް މެދުކަނޑާލާނެއެވެ. އަދި 7 ޖޫން އިން ފެށިގެން މި ޚިދުމަތަށް އެދި ހުށަހަޅަންޖެހޭނީ ވަންގަވް ޕޯޓަލް މެދުވެރިކޮށް ކަމަށް އެ އޮތޯރިޓީން މަޢުލޫމާތުދެއެވެ.

އެމް.އެފް.ޑީ.އޭ އިން އިތުރަށް ބުނެފައިވަނީ، ޚިދުމަތް މެދުކަނޑާލާ މުއްދަތުގެ ތެރޭގައި މިހާރު ދިރިތި ޕޯޓަލްގައި ދަފްތަރުކޮށްފައިވާ ފަރާތްތަކުގެ މަޢުލޫމާތު ވަންގަވް ޕޯޓަލްއަށް ބަދަލުކުރުމުގެ މަސައްކަތް ކުރިއަށްދާނެ ކަމަށެވެ.

މިކަމާ ގުޅިގެން އިތުރު މަޢުލޫމާތު ސާފުކުރަން ބޭނުންވާ ފަރާތްތަކުން އެ އޮތޯރިޓީގެ ހޮޓްލައިން ނަންބަރުތައް ކަމަށްވާ 7203204 ނުވަތަ 3014221 އަށް ގުޅުއްވުމަށް އެމް.އެފް.ޑީ.އޭ އިން އިލްތިމާސްކުރެއެވެ. މި ބަދަލަކީ ޚިދުމަތްތައް ލާމަރުކަޒީކޮށް، އެއް ފުރާޅެއްގެ ދަށުން ފަސޭހަކަމާއެކު ރައްޔިތުންނަށް ފޯރުކޮށްދިނުމަށް ސަރުކާރުން ކުރަމުންދާ މަސައްކަތުގެ ތެރެއިން ގެނެވޭ ބަދަލެކެވެ.